МОНГОЛ СУРАГЧИД “ГРАН КЛАВИР” ӨСВӨРИЙН ТӨГӨЛДӨР ХУУРЧДЫН ТЭМЦЭЭНД АМЖИЛТТАЙ ОРОЛЦОВ

Монгол Улсын Соёлын элч, Урлагийн гавъяат зүтгэлтэн, Мадрид хотын Хөгжмийн төв консерватори “Аманиэл”-ийн төгөлдөр хуурын багш Д.Мэндмаа ийн санаачлагаар Испани Улсад 10 дахь удаагаа зохион байгуулагдсан өсвөрийн төгөлдөр хуурчдын “Гран Клавир” олон улсын тэмцээн 2025 оны 3 дугаар сарын 27-29-ний өдрүүдэд амжилттай зохион байгуулагдав.

Энэ удаагийн уралдаанд Испани, Польш, Сальвадор, Армен, Румын, АНУ, Франц, Канад, Гүрж, ОХУ, Монгол зэрэг олон орны нийт 80 гаруй сурагч гурван ангилалд ур чадвараа сорьж, монгол сурагчид амжилттай оролцон шагналт байрууд эзлэв.

Олон орны өсвөрийн төгөлдөр хуурчдын ур чадварыг дээшлүүлэх, олон улсын тэмцээн, фестивалд уригдах, цаашлаад мэргэжлийн нэр хүндтэй их дээд сургуульд суралцах боломжийг нь нээж өгөхөд чухал ач холбогдолтой энэхүү тэмцээн жилээс жилд цар хүрээ нь тэлж байна.

Тэмцээний шүүгчээр Соёлын элч, багш Д.Мэндмаа, Хатан хаан Софиягийн нэрэмжит Хөгжмийн дээд сургуулийн багш Вадим Гладков, Вена хотноо уран бүтээлээ туурвиж буй төгөлдөр хуурын багш Наталъя Петрушенко, Испанийн төгөлдөр хуурч, хөгжмийн зохиолч Густаво Диаз Жерез, Монгол Улсын Консерваторийн Сонгодог хөгжмийн тэнхмийн багш нар тус тус ажилласан байна.

 Шагнал гардуулах ёслолд Мадрид, Алкала хотын соёл урлагийн асуудал хариуцсан дарга нарын албан хүмүүс уригдан оролцож багш сурагчдад, зохион байгуулагчид, дэмжигч эцэг эхчүүдэд баяр хүргэн үг хэлэв.