ЮНЕСКО-ГИЙН ДЭЛХИЙН ӨВИЙН ХОРООНЫ 20 ДУГААР ЭЭЛЖИТ БУС ЧУУЛГАНД ОРОЛЦЛОО

UNESCO -гийн Дэлхийн өвийн хорооны 20 дугаар ээлжит бус чуулган энэ 11 дүгээр сарын 25-ны өдөр шинээр сонгогдсон бүрэлдэхүүнтэйгээр хуралдаж, Монгол Улсаас Бүгд Найрамдах Франц Улсад суугаа Онц бөгөөд Бүрэн эрхт Элчин сайд, ЮНЕСКО-гийн дэргэд суугаа Байнгын төлөөлөгч У.Нямхүү тэргүүтэй төлөөлөгчид оролцов.

Ээлжит бус чуулганаар БНСУ-ын Бусан хотноо ирэх 2026 оны 7 дугаар сарын 19-29-ний өдрүүдэд болох Дэлхийн өвийн хорооны 48 дугаар чуулганы товчооны бүрэлдэхүүнийг томилов. Чуулганы даргаар БНСУ-аас ЮНЕСКО-гийн дэргэд суугаа Байнгын төлөөлөгч асан ноён Lee Byong Hyun, дэд даргаар Ямайк, Турк, Украин, Сенегал, Ливан улс сонгогдож, чуулганы илтгэгчээр /rapporteur/ Ямайк Улс томилогдлоо.

Энэ үеэр Элчин сайд, Байнгын төлөөлөгч У.Нямхүү үг хэлэхдээ Дэлхийн өвийн хорооны 48 дугаар чуулганы даргад баяр хүргээд Монгол Улс Дэлхийн өвийн хорооны шинэ гишүүний хувьд дэлхийн соёлын болон байгалийн хосгүй өвийг хадгалж хамгаалж, түгээн дэлгэрүүлэх үйлсэд ёс зүй, мэргэжлийн өндөр түвшинд хариуцлагатайгаар ажиллахаа илэрхийлэв. Мөн гишүүн улсууд, Нарийн бичгийн дарга нарын газар, шинжээчид болон бүх оролцогч талуудтай ойр нягт, идэвхтэй хамтран ажиллахаа нотлов.