ДЭЛХИЙН ӨВИЙН ХОРООНЫ ХУРАЛ БОЛОВ
2025 оны 7 дугаар сарын 6-наас 16-ны өдрүүдэд Бүгд Найрамдах Франц Улсын нийслэл Парис хотноо хуралдсан Дэлхийн өвийн хорооны (World Heritage Committee) 47 дугаар ээлжит чуулган өндөрлөв.
Тус хорооны ээлжит чуулганаар манай улстай холбоотой хэд хэдэн асуудлыг авч хэлэлцсэний дотор Дэлхийн өвд байгалийн ангиллаар бүртгүүлсэн “Дагуурын ландшафт” өвийн хадгалалт хамгаалалтын тайланг авч хэлэлцсэн бөгөөд Дэлхийн өвийн жагсаалтад байгалийн ангиллаар бүртгүүлэхээр нэр дэвшүүлсэн “Дорнод Монголын тал хээр” номинацийн материалыг авч хэлэлцэн уг номинацийн Дэлхийн өвд багтах хосгүй үнэт зүйлсийг гишүүн орнууд цохон тэмдэглээд гурван жилийн дотор нэмэлт мэдээллийн хамт дахин хэлэлцүүлэх шийдвэрийг хорооноос гаргалаа.
Мөн Дэлхийн өвийн урьдчилсан жагсаалтыг хорооны хурлаар шинэчлэн баталсан бөгөөд манай улсаас өргөн барьсан “Цайны их замын Монголын хэсэг” өвийг урьдчилсан жагсаалтад оруулж баталлаа. Энэ удаагийн Хорооны хурлаар нийт 26 өвийг Дэлхийн өвийн жагсаалтад шинээр бүртгэсний дотор бидний сайн мэдэх Диснейн кинонд мөнхлөгдсөн гайхамшигт шилтгээн - Баварын хааны ордон бүртгэгдлээ.
Энэхүү хорооны дараагийн хуралдааныг БНСУ-ын Бусан хотноо 2026 оны 7 дугаар сарын 19-29-ний өдрүүдэд хийнэ.