ФРАНЦ СУРАГЧИД ЭСЯ-НАА ЗОЧЛОВ

Парис дахь Монгол Улсын ЭСЯ-тай зэргэлдээ хөршлөн байдаг 120 жилийн настай Дупанлүүп дунд сургуулийн 64 сурагч, багш нарын хамт Элчин сайдын яамнаа зочилж,  монгол өдөрлөг хийв.

Эдгээр сурагчдыг “Нулимс мэлтэлзсэн толгод” буюу “Col de milles armes” хэмээх зохиолоор Монголчуудын аж амьдралтай танилцан, улам ихийг мэдэх хүсэл төрж, ЭСЯ-д хүсэлт гаргасныг нааштай хүлээн авж, сурагчдыг халуун дотноор хүлээн авав.

Тус өдөрлөгөөр хүүхэд багачууд ЭСЯ-ны үйл ажиллагаатай танилцан монгол гэрээр зочилж, Элчин сайдтай уулзалт хийн ярилцлаа. Франц сурагчид ЭСЯ-ны хамт олонд найрсгаар хүлээн авч, Монгол орны өнөөгийн хөгжил, ахуй соёл, түүхийн талаар тодорхой мэдлэгтэй болсондоо талархлаа илэрхийлэв.

Хүүхдүүдийн танин мэдэх, сурах хүсэл эрмэлзлэлийг олон талаар дэмжин тэтгэх, оролцуулах нь сургуульд олж авдаггүй өргөн дэлгэр мэдлэгийг олж авах суурь болж, ээдрээтэй болж буй өнөөгийн нийгэмд харилцан нэг нэгнээ ойлгох, хүндлэх ухамсар суулгах ач холбогдолтой талаар элчин сайд У.Нямхүү тайлбарлав.