Улс төрийн харилцаа

2025-10-24

Дипломат харилцаа
Монгол Улс, Бүгд Найрамдах Франц Улс 1965 оны 4 дүгээр сарын 27-ны өдөр дипломат харилцаа тогтоосон.
Франц Улс 1966 онд Улаанбаатар хотод, Монгол Улс 1969 онд Парис хотод Элчин сайдын яамаа тус тус нээсэн.
2025 онд хоёр улс дипломат харилцаа тогтоосны 60 жилийн ойг тэмдэглэв.
 
Элчин сайд
Монгол Улсаас Бүгд Найрамдах Франц Улсад суугаа Онц бөгөөд Бүрэн эрхт Элчин сайд:
  • У.Нямхүү
Бүгд Найрамдах Франц Улсаас Монгол Улсад суугаа Онц бөгөөд Бүрэн эрхт Элчин сайд:
  • Коринн Перейра да Силва (Corinne Pereira da Silva)
Харилцааны байдал
 
Монгол, Францын харилцаа улам бүр өргөжин хөгжиж байгаа бөгөөд Франц Улс нь Монгол Улсын "гуравдагч хөрш", Европ дахь чухал түншүүдийн нэг юм.
Хоёр улс ардчилал, хүний эрх, хууль дээдлэх ёс, тогтвортой хөгжил, олон талт хамтын ажиллагааг дэмжих нийтлэг үнэт зүйлсэд тулгуурлан хамтын ажиллагаагаа хөгжүүлж байна.
2023 оны 10 дугаар сард Монгол Улсын Ерөнхийлөгчийн Франц Улсад хийсэн төрийн айлчлалын үеэр 2023–2028 оны Монгол–Францын хамтын ажиллагааны үйл ажиллагааны төлөвлөгөө батлагдсан бөгөөд энэ нь хоёр талын хамтын ажиллагааны шинэ чиглэлүүдийг тодорхойлсон.
 
Хоёр талын хамтын ажиллагааны механизм
Хоёр улс дараах үндсэн механизмуудаар хамтын ажиллагаагаа хөгжүүлж байна.
  • Гадаад харилцааны яамд хоорондын улс төрийн зөвлөлдөх уулзалт
  • Эдийн засаг, худалдаа, хөрөнгө оруулалтын хамтын ажиллагаа
  • Эрчим хүч, тэр дундаа цөмийн эрчим хүч, эрчим хүчний шилжилтийн салбарын хамтын ажиллагаа
  • Хөдөө аж ахуй, хүнсний үйлдвэрлэл
  • Батлан хамгаалах болон иргэний аюулгүй байдал
  • Боловсрол, шинжлэх ухаан, археологи
  • Соёл, аялал жуулчлал
  • Парламент хоорондын хамтын ажиллагаа
Парламент хоорондын хамтын ажиллагаа
Монгол Улсын Их Хурал болон Францын Үндэсний Ассамблей, Сенат хооронд найрамдлын бүлгүүд тогтмол ажиллаж, парламентын хамтын ажиллагааг өргөжүүлэн хөгжүүлж байна.
Францын Сенат болон Үндэсний Ассамблейд Монгол Улстай хамтын ажиллагааг дэмжих найрамдлын бүлгүүд үйл ажиллагаагаа тогтмол явуулж, хоёр улсын хууль тогтоох байгууллагуудын харилцааг бэхжүүлэхэд хувь нэмэр оруулж байна.